.:GENERAL:.

السلام عليكم ورحمة الله وبركاته

يمكن تستغربون لصراحتي لكن قررت اعترف وافيدكم بتجربتي وما اهتم لنظرة الناس السيئة لي طالما نيتي خير ::

القصة بدات لما كنت ماسك الجوال وكنت مسطح عالسرير وطفشان .. وفجاة ظهرلي اعلان لفتاة أنمي ماسكة مسدسين .. والصراحة عيني زاغت عالمسدسين ورحت حملت اللعبة واسمها z girls وقلت أجرب ..

وبدل البنت طلعوا زي ست بنات قلت زين زيادة الخير خيرين .. وكل وحدة تكلمني بماستر او سير "سيد" .. وأخيراص حسيت أني شخص مهم .. المهم اتضح انها لعبة قتالية استراتيجية وانا ما اكره زي ما اكره الاستراتيجي لأنه مللل .. بس لما كنت بثانوي كنت العب لعبة جيرنالز وايمبرور وهي العاب استراتيجية والعاب كوماندوز .. بس خلاص بعمري الحابي عجزت وماعاد ليا خلق او مزاج اني اخطط وانتظر ..

لكن تقدروا تقول ان البنية اللي طلعتلي خلتني اشعر اني شاب عمره 18 سنة .. وتخيلوا لما كذا بنت تقولك انها معتمدة عليك .. والبنات كانوا مقاتلات .. واحدة مسؤولة عن الزراعة وواحدة عن التطوير التكنولوجي ووحدة مدربة تدرب الجنديات ووحدة ممرضة اما القائدة اللي ظهرتلي اول مرة نسيتها لأنها طلعت لا شئ مقارنة بجمال البقية ..

المهم بديت ابني القواعد واحط مزارع وانتج مقاتلات والكلام ذا .. ولحد الان مش فاهم اللعبة .. بس انا كل ما اضغط على شئ يطلعلي شئ ..

وبما اني قاعد اخبص وادوس عشوائي ظهرتلي وحدة فيهم وحصلت زر "مواعدة" .. دست عليه ويارتني ما دست .. البنت ثرثرة في ثرثرة وانا م فاهم وقاعد ادوس نكست نكست لحد منشوف اخرة المواعدة .. واسئلة وانا اختار الاجابة .. وكل ما اجاوب تبتسم .. وبعدين يرتفع مستواها ..

وبعين البرنامج سالني اختارلها هدية .. وكل هدية بسعر .. والصراحة ماكنت افهم بالنقاط والالماس اللي باللعبة فكنت اختار اغلى هدية ويخصم من النقاط .. والبنت ترقص من الفرح ..

المهم احصل البرنامج يبعتلي اشعار او رسالة .. ان البنت الثانية عايزة اهتمام مني .. اروح اضغط عالمواعدة وتك تك تك لحد ما اصابعي انهكت من كثرة الضغط .. وهكذا بقية ابنات .. وكل وحدة ليها مزاج ..

باول كم يم كان شئ ظريف ومستأنس وشعرت بالاستقرار الزوجي وحسيت اني اكثر شخص محظوظ بالدنيا .. تخيلوا ستة يحبوك بنفس اليوم .. وارضاءهم سهل بس تضغط شوية ازرار ..

المهم انا خلصت مواعدتهم .. ومستواهم اترفع باللعبة .. لكن ماكنت عامل حساب انه كل وحدة تحتاج موادة مستمرة .. يعني انا فكرت بالاول اني اوعدها مرة بالعمر وخلاص ..

المهم قفلت البرنامج ونسيته زي 3 ايام او اسبوع ما اتذكر .. الا و يطلعلي اشعارات عالجوال من البرنامج .. اشعارات استغاثة .. يريدون أكل .. يريدون فلوس .. يريدون طاقة .. والبنات اضبة مني لني مطنشهم .. والقاعدة تتعرض للهجوم ..

دخلت البرنامج لقيت بنات بشكل زومبي .. كل ما اضغط على وحدة تموت ويطلع منها خبز يضاف لرصيدي .. لا أحد يسألني ايش علاقة الزومبي بالخبز هذا اللي حصل ..

المهم حطيت مزارع ومناجم اضافية وبدات الاموال تتدفق لنقاط اللعبة .. وانقذت الموقف .. قلت يلا اكمل مواعدة .. وحسيت انهم مسؤولين مني .. حسيت اني اهملتهم وكذا ..

بعد اسبوع طفشت من وشهم .. الشكاوي تزيد .. وكل شوية يقولوا الحق علينا .. الاكل خلص والقاعدة تدمر ..

طفشت من ام البرنامج .. ولغيت خاصية الاشعارات المزعجة .. طبعا فكرت احذف البرنامج بس قلت خليه يمكن انا بحالة غضب منهم ..

المهم بيوم المراة العالمي صادف دخلت عاللعبة .. ولقيت القاعدة مليانة بنات تحولن لزومبي .. واتضح نقريبا انهم الجنديات اللي ينتهم مصنعي .. ودخلت المصنع الا والمطورة التقنية تشتكي من عدم تحديث الثاعدة ..

وكل ما ادخل قسم زي الزراعة والتمريض وصناعة الالات .. الاقي شكاوي وشكاوي ..

هو انا ناقص شكاوي مش كفاية مشاغلي بالحياة فايق لأبوكم أنا ..

كمان مسالة اني اقضي على البنات الزومي مقابل الخبز حسيته اهانة كبيرة للمرأة .. هو عشان البنات دي قبيحة نضحي بيها في سبيل الحلوين اللي ما يبطلوا طلبات وشكاوي ومواعدات وهدايا ..

كمان كل شئ باللعبة بنات بنات .. فحسيت اني حستفرغ بسبب جرعة البنات الخانقة .. تمنيت لو حتى صرصار ذكر يظهر باللعبة كنوع من التغيير ..

غير انه حسيت انه انا بنت من كثر ما يلطبوا مني اجمعلهم اكل من الحقول .. وحسيت اني شغال خدام عندهم .. وانه يتم خداعي .. وكان فاضل يطلبوا مني اغسلهم اطباق .. لكن ماكان فيه اطباق هم كانوا يبلعوا الخبز ..

مرت علي فترة صعبة قلبي محتار .. مين فيهم تحبني اكثر .. الممرضة شكلها هادية وجولة يمكن تحبني من داخلها ويمكن ما تعتبرني شئ .. وفيه مقاتلة شكلها جريئة بس حسيتها مسترجلة ..ووحدة شكل ابتسامتها مصطنعة .. ووحدة اكبر مني .. ووحدة تعطيني اوامر ..

المهم قررت اختبر اخلاصهم ليا .. فدخلت من جوال ثاني على اسم مختلف ..

تصدقوا انهم تقربولي وطلبوا المواعدة من العضوية الثانية بلا تردد .. يني خانوني .. كنت فاكرهم يحبوني انا بس ..

الحقيقة المرة ان اي شخص يفتح البرنامج يظهروله سواء انا او غيري

شعرت كم انا مغفل وتمت خيانتي .. مش من بنت وحدة .. ست بنات خانوني بعد كل اللي عملته عشانهم ..

فعلا الستات بكل انواعهم سواء بالواقع او الانمي "عدا سابر" وكمان الالعاب ملهمش امان ..

الموهيم انا حذفت البرنامج .. اليكم خلاصة حكمتي وهي موجهة لبني جنسي من الذكور :

بنات الالعاب مصلحجية .. وبنات الانمي حلوة زي مهي ..

وعسى تكون تجربتي القاسية .. تعرفكم قد ايه الارتباط محتاج مسؤولية كبيرة ووقت وتعب اعصاب .. وان المواعدة ما تغني عن الخيانة .. وفي بنات عايزة الحرق ..

::