بس لاتنسو ردودكم
ناقتـي ..ياناقـتـي لاربــاع ولاسـديـس
وصليني لابتـي مـن ورى هـاك الطعـوس
حايلٍ رابع سنه مـن خيـار العيـس عيـس
خفّها لادرهمـت ..كنـه بالنـار امحسـوس
في دجى خالـي خـلا لاحسيـس ولانسيـس
تدوخك من شدة البـرد طقطقـة الضـروس
في عيوني يكفـخ الطيـر ويطيـح الفريـس
وانتهض جساس من دون خالتـه البسـوس
وفي خفوقي فرخ جنيـة ٍ يضـرس ضريـس
يوم أورّدهـا هجـوس ٍ واصدّرهـا هجـوس
ديرتي دار ابن ضاري وابـن غثلـم جريـس
ديرة اللي دوّجوا فـي فيافـي نجـد جـوس
ديرتـي يابنـت شيـخ ٍ ومعدنهـا نفـيـس
عيطمـوس ٍ دونهـا دثرتنـي عيطـمـوس
جادل ٍ مطرق جسدهـا مـع الغربـي يميـس
طينة ٍ مـن تربـة الخلـد والـدم امحمـوس
نقّشت خمس ٍ من الخمس في يوم الخميـس
ليـت شعـري مـاأرادت بهـذا دختـانـوس
كـم تمنـى إمّـعـه مثلهافتـنـه ابلـيـس
كان يمكن قـد قلـب نـص أمتنـا مجـوس
كن دنـاة الصـدر منهـا كنيسـه او كنيـس
صومعـة رهبـان ديـر ٍ يـؤدون الطقـوس
آتقـوّس مـع تقـوّس نواهدهـا واقـيـس
قبتين ٍ قاب قوسيـن قـوس ٍ جنـب قـوس
خصرها يحكـي لنـا واقـع القـوم التعيـس
وردفها عن غطرسـة بـوش يعطينـا دروس
وبالرغم مـن قصرهـا مايجالسهـا جليـس
تصبح اطول نسوة الأرض في وضع الجلوس
العروسـه ماتبـي غيـر ابوتركـي عريـس
العروسـه نجـد ماهـي بحـي الله عـروس
نجد بنت المجد و ِنسـت وونسهـا الونيـس
ماعسفها الامعـزي ..فحـل يـوم العبـوس
كلهم نجد ٍ هلي ..من أجـا حتـى الخميـس
في ذراهـم باتقـي عـن مقففـة الرسـوس
وعيشتي مابين اسود ٍ ولـو مانـي رئيـس
خير من كوني رئيس ٍ علـى شرقـة تيـوس
وليس عيبا إن خدعنـي بمكـره كـل هيـس
لأن مايفهـم بطبـع الهيـوس الا الهيـوس
مصطفى فـي مأدبـة عمـه البابـا لويـس
كبّر اللقمه .. تحت ضوء حمـراء الكـؤوس
وطسم حدّثها علـى حائـط المبكـى جديـس
يوم شقـت ثوبهـا بنـت عفّـار ٍ شمـوس
سيـدة هـاك القصـر إسمهـا الأول لميـس
دونها سمـر الحناجـر بترهـا حـد مـوس
قسقسة أحرارهم ..قيس ..قيس ..قيس ..قيس
والبستهـم مـن مهانتهـم انـواع اللبـوس
بين خدعة شعب أخيـل ٍ ..ومولـد أدوليـس
درّسـون الآلهـه والـمـدّرس هـومـروس
ويش لاقوا من قناة السويس اهـل السويـس
وويش لاقوا ...من !!!!! قوم ٍ مـن سنـوس
كلهم مـن شـدة الجـوع راحـوا خندريـس
بين غيبوبة مخدّر وصحـوة عـرق سـوس
ثـورة ٍ راحـوا سببهـا بتـوع الأتوبـيـس
وش نبي فيهـا وهـي ماتهـز الا الغـروس
آفة المرء إثنتان إلـف كـاس وحـب كيـس
والنفوس اليا بغيـت اتعرفهـا إرم الفلـوس
ينكشف زيف الشعارات ..الى حمي َ الوطيس
ترجع الأذناب أذنـاب وتبقـى الـروس روس
صدق لاقالوا العرب مايحـوس الا الخسيـس
ولايوطّي الروس ..شي ٍ مثل ضعف النفـوس
ناقتـي ..ياناقـتـي لاربــاع ولاسـديـس
وصليني لابتـي مـن ورى هـاك الطعـوس
المفضلات