كل شخص وله نسب واصل وعراقه
له بعد دوله وعايش في ذراها

لو لسان اللاش مفكوكٍ وثاقه
حنا داره مادرينا عن هواها

لي بني عمٍ مهي تدنا الشفاقه
والدول من هيبة اصغرها اتراها

واحمد الله في سما العز وسياقه
المراكز الاوله ماارضى سواها

افتخر لا شفت انا اسمي في البطاقه
واسم ابوي ولابتي في محتواها

والدي نبع الكرم شيخ الطلاقه
فدوته قومن محد يمدح عطاها

للخوي معكاز لامن كسر ساقه
والجمايل دايما يطرد وراها

المجامل لاحضر ينبذ نفاقه
مايحب اللي على ربعه تباها

افتخر في ماذكرت ولي علاقه
بس باقي قطعة الكبد وغذاها

سيدة قلبي ونبضه واشتياقه
بعدطاعة خالقي اطلب رضاها

كل شي يسهل على قلبي فراقه
غير وجه امي جعل روحي فداها

وكل شي له نهايه وانطلاقه
غير الارض اللي محد يعرف مداها

وكل حي وله من الثقلين طاقه
مستحيل انه يعدي مستواها

وكل شي له علاج الا الحماقه
في تواريخ البشر يصعب دواها

وكل اعاقه في الجسد ماهيب اعاقه
بس لاجت فالفكر مشين بلاها

وكل شخص وله علاقات وصداقه
يربح الطيب ويخسر في حداها

لابغيت اتعرف منهو شف رفاقه
بيتبين طيب نفسه من رداها


✍محمد بن احمد ال عباده