باك^^
نكمل
ما أسمي جيتنا على مكة مصيبة..بالعكس نعمة ومكة مرررة حلوة ^^
بس..... أنا كطفلة وقتها..كل شي حولي كان كأنه عالمي..كإني طفل بينزعو منه كل أملاكه..
أتذكر لما شفت الرجال اللي بينقل العفش جا مسك بطوط الكبير اللي معلقته جنب الطاقة رحت عضيته لين صار يزعق
وأقول له أترك أشيائي إطلع برا يا دخيل>> متأثرة بالأفلام
تتذكرون سنان؟؟
كنت مرررة أحبه وأموت في لالة و أبوه السيد رحمون..وأحب الغليون حقه كان حلم عمري أذوق الغليون كنت أحسب إنه داخله في شوكولاتة ^^
وكنت انقهر من ذعبوور بس أتذكر الدب اللي طول الوقت ماسك كسارة الجوز ما أذكر شو إسمه..مرة وقف قدام زعبور وقال له: أرجووووووووك يا زعبووووووووور
من وقتها كل ما بدي أقول لأحد أرجوك أقول له أرجوووك يا زعبور
لين الحين أحيانا لما أمزح مع أخواتي أقول لهم: أرجوووك يا زعبووور ^^
الموووهيم لما جينا على مكة..كنت حاسة نفسي في عالم جديد
لأنو بصراحة..مجتمعنا في الرياض أو الناس اللي كنا نختلط بيهم كانو كلهم أو أغلبهم سوريين ولبنانيين..ما كنت أعرف أتكلم سعودي أصلا خخخ
صارت لي أزمة نفسية رح أحكيكم هي مع الأيام بسبب تحول الهجة من السوري إلى السعودي
أول ما جينا مكة...حسيت نفسي في كوكب فضائي جديد حتى عماتي اللي كانو عايشين في مكة...
كنت مرة أحسهم أغراب عني كنت أتعامل معهم مثل الضيوف
في مسلسل ليدي لين راسيل تتذكرو الحلقة اللي يروحو فيها عند المرة والرجال اللي كانو أصحاب أم سارا؟؟
شفتو كيف لين تنحني قدامهم وتقول لهم أنا لين مدري إيييييش ( الإسم الكااامل) راسيل؟؟
نفس الشي سويت يوم شفت عماتي
انحنيت قدامهم وسويت مثل لين
أصلا أيام ما كنت صغيرة كنت مررررررة أعشق مسلسل ليدي لين..
كنت أحب الأغنية اللي تطلع في بداية الحلقة الأولى لما تكون في الطيارة مع أمها..
وأحب الأرنوب حقها كان عندي أرنوب يشبهه ^^
كنت دايما أسرح شعري زيها ولما أحد يسألني شو إسمك؟ أقول له لين راسيل
كمان كنت أتخيل إنو أختي الكبيرة هي سارا وكنت دايما أناديها سارا خصوصا إنو في بداية علاقتي معاها كان في شوية تاتش في العلاقة لأنو أختي هذي أكبر مني ب9 سنين
وما جاها أخت إلا بعد 8 سنين اللي هي أختي اللي أكبر مني بسنة
فهما الإثنين قريبين من بعض ولما أنا جيت اعتبروني غريبة عنهم وكانو دايما مع بعض وأنا لوحدي مع ألعابي ومع المسلسلات اللي تجي في التلفزيون
تتذكرو في مسلسل لين في نفس الحلقة اللي قلتلكم عنها..لما لين تلاقي سلم مهجور وتقول لها السيدة اللي شعرها أحمر إنو فوق في حاجات حقت أم سارا وفيه كتاب موسيقى حقها
لما لين تطلع على السلم وفجأة ينكسر السلم وتطيح لين ويمسكها أبوها ويطيحو الإثنين وفي يدها الكتاب
الموقف هذا أثر فيا مررررررة لين دحين أنا قاعدة أكتب لكم والدموع والله في عيني..
وقتها صرت مهووسة بالسلالم كل ما أشوفها أطلع عليها وأرمي نفسي وأنتظر أبوي يجي يشيلني بس كل اللي يصير إنو أبوي يمر من جنبي ويقول لي يا بنت قومي من الأرض
ويعدي
أحب الحلقة اللي تكون فيها لين قاعدة ترسم وفجأة يطلع لها عصفور في الشباك بطنه لونها أحمر وتقوم تجري وراه وتكسر الغرفة ^^
يااااااااه لما أتذكر لين راسيل أحس إنها ما زالت عايشة داخلي
لين دحين أجلس أغني أغنيتها وأتذكر الحصان الأشقر حقها أليكساندر
أحب الحلقة اللي تضحك ميري عليها فيها وتاخذ منها المفتاح حق أمها..
وتروح هي عشن تدور عليه وتقابل سيدة الثلج اللي تقول لها لو ما فزتي عليا رح تتحولي لقالب ثلج >_<
كنت أحس إني عايشة التحدي معاها وخايفة إنها تخسر..والله كنت أبكي لما أشوف الحلقة ومن هذاك الوقت وأنا نفسي أشوف ميري على أرض الواقع وأقتلها
وحتى توماس الكلب اكرهه لما يدعس لها على الزهور اللي هي تحبها
ولما البارونة وتوماس وميري يقولولها إنو أمها ماتت..ما يستحوو....>_<
تفووو عليهم
والله حرام البنت صغيرة ليش يسوو فيها كدا؟؟
أكره البارونة مرة ما أحبها
بالذات لما حبست لين فوق في الغرفة المظلمة...
أحب الأغنية اللي تكون فيها لين واقفة في البلكونة وتطالع النجوم واللي تظهر فيها صورة أمها...مرة نفسي في الأغنية لو أحد عندو ياها ياريت يعطيني ياها بس تكون إم بي ثري ^^
<==== شحاتة وتتشرط
لما جات سيرة لين انفتح حلقي مدري ليه كل ما أتكلم عنها أحس إني رجعت لعمر خمس سنوات..
مرررررة أحبها هي مسلسلي المفضل...وفي كثير مسلسلات أحبها بس هذي المفضلة عندي..واللي ما زلت أحسها عايشة داخلي لين الحين
أحب الحلقة حقت العيد اللي يغنولها: عيد سعييييد يا آنسة ليييييين
أيام كلها فرح يا ليين ^^
آسفة طولت الهرجة بس تحملوني عاد جوتي طفلة مهما أنا كبرت عمرها ما رح تكبر أحس إني مفتقدة طفولتي وبحاول أعيشها
حتى حوريكم صور غرفتي عشن تعرفو أنا وين عايشة هههههههههه
حاطة الصور في هذا الموضوع
تعالو نشوف صور غرف نوم الأعضاء..حطيت صور غرفتي كل واحد يجيب صور غرفتو
بتمنى الكل يشارك فيه ^^
لما جينا مكة..سجلت وقتها في الحضانة بمدرسة القبلة الإسلامية
أتذكر الأحداث وقتها كأنها أمس صارت ^^
وقتها كنت كل يوم أشتري عصير توم وجيري كان عصيري المفضل..كنت أحب بطاطس زينة ونحول..وأشتري الحلاوة اللي عبارة عن أنبوب شفاف مرررة طويل وفيها بودرة ملونة كأنها سكر..ما اتذكر إسمها بس كنت أسميها حلاوة بودرة
كمان كنت أحب الحلاوة مصاص حقت غندور اللي لون الورقة حقتها فوشي ولما تخلص في بآخرها علكة ^^
والحلاوة كرز اللي عصايتها خضرا وفيها كورتين لونها أحمر بطعم الكرز ^^ كنت أحب أقسمها وأعطي واحدة لي وواحدة لأختي
وأحيانا ناكلها نحن الإثنين سوا نحط الكورتين في فمنا ونجرها لين تنكسر العصاية ^^
الموووهيييم..لما جينا مكة..ما كان عندنا بيت لسة..فنزلنا وقتها سنة في بيت جدي لين نخلص بنا البيت الجديد حقنا
في بيت جدي
كان عندو حديقة أمامية وبركة فيها نافورة
كنت أحيانا أشوف نحلة أو دبور يطيرو قريب الزهور...كنت أقول في قلبي هذا نحول أو زينة..جو ينادوني ألعب معاهم..أسوي طبعا إني الأميرة والضفدع وأقعد على حافة البركة وأغني بصوت قلك يعني زي سنووايت عشن يجوني..وكل شوي أناظر بطرف عيني ألاقيهم مطنشيني
آخر شي أروح لهم قلك أبلعب معاهم يطيروا >_<
كنت مرة أنقهر..بس الحمد لله إنهم كانو يطيرو أحسن ما يقعدو وآخذلي قرصة نحلة ولا شي
ربي دايم رحيم بالأطفال بس شوفو كيف كنا بريئين من جد أياااااام
كنت أعيش في عالمهم ^^
على سيرة زينة ونحول..في حلقة من حلقاتهم..يكون فيها خنفسا مذكر طبعا يحب تجمع القمائم..فاكرين دي الحلقة؟؟
تضحكو لو أقول لكم إنو مررررة تعاطفت معاه لما قعد يبكي ويقول قمااائمي العزيزة قاذوراتي الحبيبة..ما أفتكر وقتها مين أخذها منه بس من جد مرررة حزنت عليه وقعدت أبكي
كمان في شي مرررا أحبوووو
فاكرين هالو كيتي؟؟
البسة اللي كانت صورها منتشرة وبوستراتها ونحن أطفال؟؟
مرررة كنت أحبها
حتى إني كنت أسمي القطط حقوني يا كيتي يا بوسي ^^
أحب هالقطة مرررة
تتذكرو ماوكلي أبو شعر طويل؟؟
مرة أنقهرت لما بعدين طلعو ماوكلي الأهبل هذا اللي كأنو قاصص شعرو عند كوفيرة ما شاء الله عامل شعرو موديل كارييه
ماوكلي هذاك كان أحلى وطبيعي أكثر وكان حلقاته كثير مو فلم واحد أهبل زي ها اللي حق ديزني
كان إسم المسلسل ماوكلي فتى الأدغال..
وإسم الفلم الأهبل: كتاب الأدغال
أحب حلقات ماوكلي أحب الذئاب اللي كان عايش معاهم أحب أمه الذئبة وأخوانه الذئاب...عن جد كنت أعيش كل يوم مع أحداث الحلقات
نفسي يعرضوه من جديد دحين
على فكرة قايز أنا كتبت وكتبت كتييير لين انكسرت يدي...ولسة في جعبتي مليون حكاية
مدري أول مرة أنطلق بدي الطريقة العشوائية حاسة إنو موو أنا اللي قاعدة أتكلم.حاسة إنو الطفلة الموجودة جوتي هي اللي قاعدة تحكي ^^
إن شالله البقية في العدد القادم هع هع
يمكن بكرا ويمكن أتأخر شوي ^^
أشووفكم على خير
أطيب التحية:
أنين السكون
المفضلات