السلام عليكم ورحمة الله وبركاته
اتمنى انكم تكونوا بخير وعافية وان شاء الله بنفرح سوا بالملعب يوم الجمعة يااارب ..
انا كنت بدبي قبل اسبوع وامس رجعت للسعودية بعد مااشتقت لترابها وناسها الله يديمها لنا .
المهم فيه حادثتين صاروا لي بدبي قلت لازم اخليكم تعرفونها لانها شي يفرح والله .
- برازيلية انجنت من ماجد..
كنت في معرض في دبي وكان فيه مدير شركة المانية معنا بنفس المعرض هو صديق لي ونتقابل دايما لكن هالمرة جايب زوجته البرازيلية معه لدبي يقول ابي اعرفها على العرب والمسلمين لانها دايم تبي تشوفهم وماتعرف عنهم شي.
جلسنا وقالها هذا من السعودية وسلمنا على بعض ودردشنا بعدة مواضيع المهم قلت لها انا اعرف منتخبكم زين واعرف كل اللاعبين تبع منتخب البرازيل .. ماصدقت وصرت اقولها كل اللاعبين من ديدا الى رونالدو .. هي انبسطت وقالت انتم عندكم منتخب ؟
قلت ايه وشاركنا 4 مرات بكاس العالم .. قعدت تفكر المسكينة وماتذكرت منتخب السعودية عاد انا استحيت اذكرها واقولها ان المانيا هزمتنا 8 ولاعبنا سنتر تسع مرات ... سكت وخليتها تعدي ..
المهم تذكرت اني منزل مقاطع لماجد واهداف على منتخبات عالمية كان الموضوع مثبت هنا .
نقزت زي الذيب وقلت لها تبغين تعرفين منتخبا ؟ قالت ايه ..
قلت تعالي شوفي :
وخليتها تشوف اهداف ابو عبدالله على البرازيل والمانيا والارجنتين و و و و...
انصدمت .. والله لو انكم شايفين وجهها تحسون بوناسة فعلا انبهرت وقالت مستحيل هذا صار ..
طلبت مني تحميل كل الاهداف بفلاش ميموري واخذتها تقول ابغى اخلي اهلي يشوفوا منتخب السعودية .
انا استانست وخليتها تتفرج على مقاطع التون ودينلسون مع النصر .
صارت تصارخ يوم شافت دينلسون يلعب معنا ومو مصدقة عيونها .
اخيرا عطيتها لفة تحمل شعار النصر وقالت هذي راح اخليها ذكرى معي .. هذا فريق كبير جدا .
وسألني زوجها عن اسم اللاعب اللي سجل الاهداف ؟ قلت له ماجد عبدالله .
صفن شوي وقال : مادام معكم لاعب مثل هذا ... ليش مانافستوا على البطولات العالمية ؟؟
صراحة مدري وش اقوله ..
- النصر بوابة عبور على الحدود السعودية
بعد ماانتهى المعرض رجعت للسعودية ووقفوني الشباب عند الحدود وشكوا بسيارتنا لاني معبيها كراتين واقراص كمبيوتر .
المهم قاموا نزلوا كل شي الي في السياره وعقدوني وكرّهوني بالدنيا انتظرت يمكن ساعة وهم يفكون الكراتين ... ويوم الله بغى يرحمني .. نقز واحد منهم لسيارتي ومد يده ورا ومسك علم نصراوي كنت حاطه عشان مباراتنا الجاية وقال لي وهو يبتسم .. انتم مافكيتونا من شرّكم حتى على الحدود جايين ؟
قلت له وش نسوي الحب يسري بعروقنا .. قال كفو والله والله ترفعون الراس .
راح ونادا خوياه كلهم وخلاهم يشوفون العلم .. وقال عشان العالمي رووووووح الله معك.
آسف على الاطالة ونشوفكم بالملعب انشالله...
المفضلات