وبالمناسبة: تذكرت قصة كمان مع القرود
مرة رحنا زمان وأنا صغيرة مرة على حديقة حيوان الأنعام الجميلة -عاد مافي غيرها في جدة -
المهم يوم ما وصلنا عند قفص القرود أتكهربت وقلتلهم يالا بسرعة نبعد من هنا -عاد ما أطيق أشوف خلقتهم- استغفر الله العظيم
وخالي كان مصمم إنه يعطيهم فشار.. والدنيا عندهم زحممممة. يا ترى إيش فيه ؟
لقينا واحد كان قاعد يدخن.. وفي قرد متشعبط على القفض مفرصع عيونه كدا في الرجال وراح يتجنن القرد.. والرجال كان كل ما يسحب نفس يقوم ينفخه على وجه القرد.. وهداك كانت حتجيه الرجة
والعالم كلهم متجمعين عليهم الإثنين ومبسوطين على القرد المتنح
وبعدين لما خلص الرجال السيجارة قام راح ولع وحدة ثانية..
وبعدين أعطاها للقرد مقلوبة (يعني عكسها) .. وهدا القرد مسكين ما صدق وقام لطشها من يد الرجال وعلى طول حطها في فمه بس على الجهة المولعة
والله يا حرام قام ينطط زي المهبول ويصرخ.. وكل العالم فقعوا من الضحك عليه
وعلى الرغم من إني أكره القرود كره أسود.. لكن والله حزنت عليه وقطع قلبي ولا قدرت أضحك مع العالم.. ورحت أجري أبغى أتخبى عشان أبكي وما أحد يشوفني.. وعملتها حجة إني أبغى أهرب من عند قفص القرود..
وطرطعت والله من الرجال وكان نفسي أضربه.. وبعدين طلبت من خالي بكل براءة إن يشتري مويه ويعطيها للقرد.. لكن قالي يا شيخة خليه عندهم موية في القفص
وأصلا وقتها جا واحد شكله زي المسئول عن القفص وبعد الناس والتجمهر.. ومنع أي أحد يقرب من القفص أو يعطي القرود حاجة.
المفضلات